दत्तात्रयनगर, पारगाव तर्फे अवसरी बु, (ता. आंबेगाव) येथील भीमाशंकर सहकारी साखर कारखान्याने संस्थापक-संचालक व माजी सहकारमंत्री दिलीप वळसे पाटील यांचे मार्गदर्शनाखाली मा. संचालक मंडळाच्या झालेल्या बैठकीत घेतलेल्या निर्णयानुसार मागील सन २०२४-२५ गाळप हंगामात गाळप केलेल्या ऊसासाठी अंतिम हप्ता रु.२१०/- प्रती मे. टन सह अंतिम ऊस दर रु.३,२९०/- प्रती मे. टन जाहीर केला असल्याची माहीती कारखान्याचे चेअरमन बाळासाहेब बेंडे यांनी दिली.
संस्थापक-संचालक व माजी सहकारमंत्री दिलीप वळसे पाटील यांचे मार्गदर्शनाखाली सन २०२४-२५ गाळप हंगामात कार्यक्षेत्र व परिसरातील गाळप केलेल्या संपूर्ण ११ लाख ३८ हजार ४९६ मे. टन ऊसासाठी कारखान्याने यापूर्वी एफ.आर.पी. नुसार रु. ३,०८०/- प्रती मे. टनाप्रमाणे रक्कम रु. ३५० कोटी ६६ लाख ऊस उत्पादक शेतक-यांना अदा केलेली आहे. अंतिम हप्ता रु. २१०/- प्रती मे.टन निश्चित केला असून शिक्षण संस्था निधी रु. १०/- प्रती मे.टन व भाग विकास निधी रु. २५/- प्रती मे.टन याप्रमाणे एकूण रु. ३५/- प्रती मे.टन वजा जाता रु. १७५/- प्रती मे.टन अंतिम हप्ताची रक्कम रु. १९ कोटी ९२ लाख ऊस उत्पादक शेतक-यांचे बँक खात्यावर दिवाळी सणापूर्वी वर्ग करण्यात येणार आहे.
भीमाशंकर कारखान्याने नेहमीच ऊस उत्पादक शेतक-यांना जास्तीचा दर दिलेला असून यापुढेही हि परंपरा कायम राहील. तरी गाळप हंगाम २०२५-२६ करीता कार्यक्षेत्र व परिसरातील सर्व ऊस उत्पादक शेतक-यांनी भीमाशंकर कारखान्यास आपला ऊस देवून पुर्वीप्रमाणेच सहकार्याची भावना ठेवावी अशी विनंती कारखान्याचे चेअरमन बाळासाहेब बेंडे यांनी केली.
